Хоол хүнсний буруу хэрэглээнээс шалтгаалах батгашилт Даваажаргал эмчийн зөвлөгөө

Батга нь арьсны хамгийн түгээмэл үрэвсэлт эмгэгийн нэг бөгөөд өсвөр наснаас эхлэн насанд хүрэгчдийн дунд ч түгээмэл тохиолддог. Үүсэлд нь дааврын өөрчлөлт, арьсны тосны хэт ялгаралт, нянгийн үйлчлэл зэрэг олон хүчин зүйл нөлөөлдөг ч сүүлийн жилүүдэд хооллолтын буруу дадал батганы хүндрэлийг нэмэгдүүлдэг нь олон судалгаагаар нотлогдсон байна. Батгашилт үүсэхэд нөлөөлдөг хүнс

1. Өндөр гликемийн индекс бүхий хүнс

• Цагаан гурилан бүтээгдэхүүн, чихэр, хийжүүлсэн ундаа, жигнэмэг зэрэг хурдан шимэгддэг нүүрс ус

• Цусан дахь сахарын түвшинг огцом нэмэгдүүлж, улмаар инсулины ялгаралтыг ихэсгэнэ. Энэ нь тосны булчирхайн үйл ажиллагааг идэвхжүүлж батга үүсгэх таатай нөхцөл бүрдүүлдэг.

2. Сүү болон сүүн бүтээгдэхүүн

• Сүү, зарим төрлийн тараг, бяслаг нь IGF-1 (инсулин төст өсөлтийн хүчин зүйл)-ийн хэмжээг нэмэгдүүлдэг.

• IGF-1 ихсэх нь тосны булчирхайн үйл ажиллагааг өдөөж, арьсны үрэвслийг нэмэгдүүлдэг.

3. Тослог, шарсан хоол

• Түргэн хоол, шарсан төмс, тосонд шарсан мах зэрэг нь чөлөөт радикал үүсгэж, арьсны үрэвслийг улам даамжруулдаг.

4. Боловсруулсан, чихэрлэг хүнс

• Шоколад, хиймэл амтлагчтай хүнс, лаазалсан ундаа зэрэг нь батганы сэдрэлийг нэмэгдүүлэх эрсдэлтэй.

Зөв хооллолт ба арьсны эрүүл мэнд

• Жимс, хүнсний ногоо: Витамин A, C, E болон антиоксидантаар баялаг тул арьсыг нөхөн төлжүүлж, дархлааг дэмжинэ.

• Омега-3 тосны хүчил: Самар, загас, маалингын үр нь үрэвслийн эсрэг нөлөөтэй. • Эслэгтэй хүнс: Бүхэл үрийн бүтээгдэхүүн, овъёос, хүнсний ногоо нь цусан дахь сахарын түвшинг тогтворжуулна.

• Ус: Өдөрт хангалттай ус уух нь арьсны чийгшлийг хадгалж, бодисын солилцоог эрүүл байлгадаг. Дүгнэлт Батганы эмчилгээ зөвхөн арьсанд түрхэх эмчилгээнд бус, дотоодоосоо буюу хооллолтын зөв дадал-д ихээхэн хамаарна. Эрүүл, тэнцвэртэй хооллох нь батгашилтыг бууруулж, эмчилгээний үр дүнг сайжруулахад чухал ач холбогдолтой юм.